Malampusong gipahigayon sa Philippine Statistics Authority - Provincial Statistics Office of Zamboanga del Norte, kauban ang Municipal Civil Registry Office (MCRO) sa Labason, ang ikaduhang hugna sa Ceremonial Security Paper (SECPA) Turnover niadtung Hunyo 13, 2025, sa munisipyo sa Labason.

Ang maong kalihokan kabahin sa padayon nga implementasyon sa Birth Registration Assistance Project (BRAP), nga nagtumong sa pagpalig-on sa serbisyo sa birth registration ug paghatag ug libre nga mga dokumento sa mga katawhang wala pa marehistro o naginahanglan ug birth certificate nga nakaimprinta sa SECPA.

Miapil sa maong turnover ceremony ang mga opisyales sa PSO nga gipangulohan ni Registration Officer I Aline B. Patagoc ug Birth Registration Coordinator Juvelyn D. Abella, uban ni Municipal Civil Registrar Bernadeth A. Oandasan, mga barangay officials, ug mga benepisyaryo sa lungsod. Pinaagi sa maong programa, daghang mga residente sa nagkalain-laing barangay sa Labason ang nakadawat na sa ilang SECPA copy sa birth cerficate - usa ka importanteng dokumento sa ilang identidad ug legal nga mga transaksyon.

Nagpasalamat usab ang PSO sa aktibong kooperasyon sa local nga pangagamhanan ug mga barangay officials nga mitabang sa pagpaabot sa maong serbisyo ngadto sa mga lumulupyo. Padayong nag awhag ang PSO sa katawhan nga magparehistro ug magpahimulos sa mga libreng serbisyo ilawon sa BRAP aron masiguro ang katukma ug legalidad sa ilang civil registration records.

Alang sa dugang kasayuran, bisitaha ang opisyal nga website sa https://rsso09.psa.gov.ph/zamboanga-del-norte o i-follow ang ipsyal nga Facebook page sa PSO https://facebook.com/psa.zdn.

ANDRES S. TAPALES, JR. 
Statistical Specialist II 
Officer-in-Charge